Author: admin

Ağcabədidə “Sahibkarlıq subyektləri üçün gənc bacarıqların səfərbər edilməsi proqramı” layihəsinin icrası davam edir və layihənin icrası çərçivəsində növbəti qruplar üçün təlimlərə start verilib. İlk olaraq Azərbaycan Dövlət Pedoqoji Universitetinin Ağcabədi filialının tələbəsi olan gənclərin iqtisadi düşüncə tərzinin inkişafı və yaradıcılığa əsaslanan biznes ideyalarının formalaşdırılması məqsədilə “Sahibkarlığa giriş və biznes ideyasının formalaşdırılması” mövzusu üzrə birinci modul təlim təşkil olunub.
Təlimin əsas məqsədi iştirakçılarda sahibkarlıqla bağlı anlayışları dərinləşdirmək, ideya formalaşdırma bacarıqlarını inkişaf etdirmək və real problemlərə innovativ yanaşma vərdişləri aşılamaqdır.
Təlimdə interaktiv oyun və praktiki tapşırıqlar əsasında iştirakçılara sahibkarlığın mahiyyəti, iqtisadi sistemdəki rolu, fərdi təşəbbüskarlığın əhəmiyyəti və müasir sahibkarların xarakterik xüsusiyyətləri haqqında məlumatlar verilib, suallar cavablandırılıb. Müzakirələr zamanı iştirakçılar risk almaq cəsarəti, innovativ düşüncə, əzmkarlıq, komanda qurmaq bacarığı kimi uğurlu sahibkarların əsas keyfiyyətlərini analiz ediblər. Təlimin gedişində iştirakçılara sahibkarlıq fəaliyyətinin seçimi məsələsinə iqtisadi yanaşma təqdim olunub. Gəlir, xərc, mühasibat mənfəəti, alternativ xərc, alternativ dəyər, iqtisadi mənfəət anlayışları izah olunub.
Təlimin sonunda iştirakçılara güclü və zəif tərəflərin, imkanların və təhdidlərin təhlilini həyata keçirən SWOT təhlili haqqında geniş məlumat verilib. Bu anlayışlar, gənclərin öz biznes ideyalarını daha mükəmməl formalaşdırmalarına və qarşılaşa biləcəkləri riskləri düzgün qiymətləndirmələrinə kömək edəcək. Eyni zamanda, iştirakçılara SWOT təhlili əsasında komanda tapşırıqları verilib və onlar birgə əməkdaşlıq edərək öz ideyalarını bu yanaşma ilə qiymətləndirdilər.

“Sahibkarlıq subyektləri üçün gənc bacarıqların səfərbər edilməsi proqramı” layihəsinin həyata keçirilməsinə Kiçik və Orta Biznesin İnkişafı Agentliyi – KOBİA tərəfindən elan edilmiş 7-ci qrant müsabiqəsi çərçivəsində qrant ayrılıb.

09 dekabr 2025-ci il tarixində Azərbaycan Dövlət Pedaqoji Universitetinin Ağcabədi filialının “Təhsildə sosial-psixoloji xidmət” ixtisası üzrə I və III tədris ilinin tələbələri Filialın Gənc Tədqiqatçılar Şurasının təşkilatçılığı ilə Ağcabədi Rayon İnklüziv Təhsil və Uşaq İnkişaf Mərkəzində olublar.

Səfər zamanı tələbələr mərkəzin fəaliyyəti ilə yaxından tanış olub, inklüziv təhsilin təşkili, psixoloji dəstək və sosial adaptasiya ilə bağlı nəzəri və praktiki biliklər əldə ediblər. Bu təşəbbüs tələbələrin peşəkar bacarıqlarının inkişafı baxımından əhəmiyyətli rol oynayır.

“Regional İnkişaf” İctimai Birliyi (RİİB) və “100 gün – 100 təşəbbüs” aksiyasına qoşulan Ağcabədi Rayon İcra Hakimiyyətinin birgə təşkilatçılığı ilə “Konstitusiya və Suverenlik İli” çərçivəsində Ağcabədi rayonunun Zəfər prospektində ağacəkmə aksiyası keçirilib.

Aksiyada ADPU-nun Ağcabədi filialının əməkdaşları və tələbələr də fəal iştirak ediblər. Ərazinin iqlim şəraitinə uyğun olaraq seçilmiş 200 ədəd şam ağacı və 300 ədəd meyvə ağacı əkilib.

03 dekabr 2025-ci il tarixində ADPU-nun Ağcabədi filialının “Riyaziyyat və informatika müəllimliyi” ixtisası üzrə IV tədris ilinin tələbələri Ağcabədi şəhər 8 saylı tam orta məktəbdə ekskursiyada olublar.

Ekskursiya çərçivəsində tələbələr məktəbdə yaradılmış STEAM və Rəqəmsal bacarıqlar otaqları ilə yaxından tanış olmuş, şagirdlərlə birlikdə 3D modellər hazırlayaraq praktiki biliklərini tətbiq etmək imkanı qazanmışlar.

02 dekabr 2025-ci il tarixində ADPU-nun Ağcabədi filialında Gənc Tədqiqatçılar Şurasının təşkilatçılığı ilə keçirilən 4 həftəlik “Ustad dərsləri”nin üçüncü mərhələsi baş tutub.

Bu mərhələdə “İctimai, təbiət fənləri və onların tədrisi texnologiyası” kafedrasının baş müəllimi Araz Boran oğlu Əliyev “Azərbaycan ərazisində qədim yaşayış məskənləri və ibtidai icma cəmiyyəti” mövzusunda dərs təqdim edib.

Təqdimatda tələbələr təkcə tarixi biliklərini genişləndirməklə kifayətlənməyib, həm də arxeoloji və etnoqrafik faktlara əsaslanaraq mövzuya analitik yanaşma bacarıqlarını inkişaf etdiriblər.

✨ Dərsin məqsədi – gənc tədqiqatçıların elmi təfəkkürünü və təhlil qabiliyyətini formalaşdırmaq, ilkin yaşayış məkanları ilə bağlı bilikləri müasir tədris metodları ilə mənimsətmək olmuşdur.

2 dekabr 2025-ci il tarixində ADPU-nun Ağcabədi filialında Tələbə Elmi Cəmiyyətinin təşkilatçılığı ilə “Tarix müəllimliyi” ixtisası üzrə III tədris ilinin tələbəsi Elmir Haqverdiyevin təqdimatında “İnformasiya təhlükəsizliyini necə qoruyaq?” mövzusunda seminar keçirilib.

Seminarda professor-müəllim heyəti və tələbələr fəal iştirak ediblər. Təqdimat zamanı informasiya təhlükəsizliyi sahəsində aktual məsələlər müzakirə olunub, iştirakçılar tərəfindən verilən suallar ətraflı şəkildə cavablandırılıb. Eyni zamanda şəxsi məlumatların qorunması və gündəlik həyatda informasiya təhlükəsizliyinin təmin olunması ilə bağlı praktik tövsiyələr təqdim edilib.

Sonda Elmir Haqverdiyevə təşəbbüskarlığına görə sertifikat və hədiyyə təqdim olunub.

01 dekabr 2025-ci il tarixində ADPU-nun Ağcabədi filialının “Dillər, ədəbiyyat və onların tədrisi texnologiyası” kafedrasının baş müəllimi Sevinc Məhərrəmovanın təşkilatçılığı ilə “Azərbaycan dili və ədəbiyyatı müəllimliyi” ixtisasının tələbələri Ağdam Dövlət Dram Teatrında nümayiş olunan M.F. Axundzadənin “Müsyö Jordannın Qarabağ sərgüzəştləri” əsəri əsasında hazırlanmış tamaşaya baxıblar.

Tamaşa tələbələrdə klassik Azərbaycan dramaturgiyasına marağı artırmaq və səhnə əsərləri vasitəsilə ədəbi-bədii düşüncələrini inkişaf etdirmək məqsədi daşıyıb.

30.11.2025-ci il tarixdə ADPU-nun Ağcabədi filialının “Dillər, ədəbiyyat və onların tədrisi texnologiyası” kafedrasının müəllimi Abdullayeva Maya Ağamirzə qızı “Microsoft Certified Educator” (MCE) sertifikasiya proqramında 786 bal toplayaraq beynəlxalq sertifikat əldə etmişdir.
Maya Abdullayeva Ölkə üzrə yerli təhsilverənlərin müxtəlif səviyyələrdə innovativ texnologiya və metodikaların təhsildə tətbiqi üzrə 30 saatlıq təlim proqramramını bitirmişdir.
Qeyd edək ki, Proqramı bitirən təhsilverənlər sadəcə pedaqoji istiqamətdə deyil müxtəlif standartlarda mərkəzləşmiş və təhsilverənlər üçün vacib olan 6+İKT istiqamətləri üzrə qiymətləndirilmişlər.
“Effektiv pedaqoq olmaq üçün İKT-dən istifadə”, “İnformasiya kommunikasiyası vasitələrindən istifadə”, “Real dünya problemlərinin həlli və innovasiya”, “Özünütənzimləmə”, “Biliyin qurulması”, “Təhsilalanla əməkdaşlıq” və “Bacarıqlı ünsiyyət” modulları üzrə yüksək nəticə göstərmiş müəllimlər “Microsoft Certified Educator” sertifikatına layiq görülmüşlər.