Xəbərlər

Ağcabədi filialı üzrə 2022-2023-cü tədris ili yaz imtahan sessiyasında ən yüksək ÜOMG-ya sahib olan 10 tələbə:

31 İyul 2023 Şərh yoxdu

1. Nağıyeva Aysu Sənan qızı.
Qrup:    AZD2101B    
ÜOMG: 100 

2.    Həsənli  İlkanə Elçin qızı.
Qrup: TSPX2001B    
ÜOMG: 100

3. Əliyeva Nuray Elşən qızı    .
Qrup: TSPX2001B    
ÜOMG: 100

4.    Aslanlı Səbinə Fikrət qızı.
Qrup:    İBT2001B    
ÜOMG: 99,83

5. Orucova Gülşən Hafiz qızı.
Qrup:    AZD2101B
ÜOMG: 99,53

6.    ƏsədovaTəhminə Sərdar qızı.
Qrup:    RİN1901B    
ÜOMG: 99,16

7. İsmayılova Ləman Hasil  qızı    .
Qrup: TSPX2101B    
ÜOMG: 99,1

8. Nadirli Gülnar İltifat qızı    .
Qrup: İBT2002B    
ÜOMG: 98,83

9. Səlimova  Gülər  Mahir  qızı.
Qrup: XDM2201B    
ÜOMG: 97,76

10.    Şirinli Nərminə Rafiq  qızı.
Qrup: AZD2002B    
ÜOMG: 97,73

Xəbərlər

ADPU-nun Ağcabədi filialında “Məzun Günü” keçirilib

22 İyun 2023 Şərh yoxdu

22 iyun 2022-ci il tarixdə ADPU-nun Ağcabədi filialında “Məzun Günü” münasibətilə tədbir keçirilib. Tədbirdə bu il məzun olan “Azərbaycan dili və ədəbiyyatı müəllimliyi”, “Tarix və coğrafiya müəllimliyi”, “Riyaziyyat və informatika müəllimliyi”, “İbtidai sinif müəllimliyi” və “Məktəbəqədər təlim və tərbiyə” ixtisasının məzunları, valideynlər, ötən illərdə filialın məzunu olmuş örnək təhsil işçiləri, filialın professor-müəllim heyəti və media nümayəndələri iştirak edirdilər.
Tədbirdə torpaqlarımızın ərazi bütövlüyü uğrunda canından keçmiş oğullarımızın müqəddəs ruhları bir dəqiqəlik sükütla yad edildi. Sonra Dövlət Himni səsləndirildi.
Tədbir iştirakçılarını, xüsusilə fəxri qonaqlar və valideynləri böyük səmimiyyətlə salamlayan filialın direktoru, dosent Mobil Məcidov məzunlara öz ürək sözlərini söyləyərkən, onların təhsil əldə etməsində filial əməkdaşları qədər valideynlərinin də əməyinin olduğunu vurğuladı və bildirdi ki, “Təhsil millətin gələcəyidir” – deyən Ulu Öndər Heydər Əliyevin təhsil ictimaiyyətinə verdiyi bu mesajı həmişə əməli fəaliyyətimizdə unutmur və millətimizin tərəqqisi, gənclərimizin elm və təhsil sahəsində uğur əldə etməsi naminə vicdanla çalışmağı özümüzə borc bilirik.
“Məzun Günü”ndə filialın müvafiq ixtisasları üzrə bir qrup məzunu filial direktorunun əmrinə əsasən “Təhsildə əldə etdiyi uğurlara görə” və “Filialın mədəni-kütləvi və ictimai təbirlərində yaxından iştirakına görə” fəxri diplomları ilə təltif olundular.
Tədbirdə çıxış edən qonaqlar və məzunlar ADPU-nun Ağcabədi filialında yaradılan örnək təhsil mühiti və uğurla həyata keçirilən imtahan sessiyasının təşkilinə görə filial rəhbərliyinə sonsuz minnətdarlıq ifadə etdilər.
Rəsmi hissədən sonra tədbir müsiqili-əyləncəli proqramla davam etdirildi.

Xəbərlər

“Heydər Əliyev və Azərbaycan elminin inkişafı” mövzusunda Dəyirmi masa.

14 Aprel 2023 Şərh yoxdu

    14 aprel 2023-cü il tarixdə ADPU-nun Ağcabədi filialında “Dillər, ədəbiyyat və onların tədrisi texnologiyası” kafedrasının təşkilatçılığı ilə Ulu öndər Heydər Əliyevin anadan olmasının 100 illik yubileyi münasibətilə “Heydər Əliyev və Azərbaycan elminin inkişafı” mövzusunda Dəyirmi masa keçirildi. Toplantıda, kafedranın müəllimləri və tələbələr iştirak etdi.

   Giriş sözü ilə filialın direktoru dos. Mobil Məcidov Ulu öndərin keçdiyi şərəfli həyat yolundan danışdı.

  Kafedranın müəllimlərindən dos.Fərzəliyeva Mətanət, b/m.Fəridə Mikayılova, b/m.Səfurə Mahmudzadə, b/m.Rzayeva Leyla, b/m.Məhərrəmova Sevinc,  tələbələrdən Elnarə Məmmdəova, Sevinc Allahyarova və  Aytəkin Quluyeva çıxış etdilər.

  Tədbirin sonunda Ümumilli lider Heydər Əliyevin həyat və fəaliyyətini əks etdirən videoçarx nümayiş etdirildi.

Xəbərlər

ADPU-nun Ağcabədi filialında Ümummilli Lider Heydər Əliyevin 100 illik yubiley

06 Aprel 2023 Şərh yoxdu

ADPU-nun Ağcabədi filialında Ümummilli Lider Heydər Əliyevin 100 illik yubileyinə həsr olunmuş “Heydər Əliyev və müstəqil Azərbaycan dövləti” mövzusunda elmi-praktik konfrans keçirildi

06 aprel 2023-cü il tarixdə ADPU-nun Ağcabədi filialının “İctimai, təbiət fənləri və onların tədrisi texnologiyası” kafedrasının təşkilatçılığı ilə Ümummilli Lider Heydər Əliyevin 100 illik yubileyinə həsr olunmuş “Heydər Əliyev və müstəqil Azərbaycan dövləti” mövzusunda elmi-praktik konfrans keçirildi.

Konfransın plenar iclasını giriş sözü ilə açan filialın direktoru, dosent Mobil Məcidov unudulmaz liderimiz Heydər Əliyevin və torpaqlarımızın ərazi bütövlüyü uğrunda canından keçmiş şəhidlərimizin müqəddəs ruhlarını yad etmək üçün bir dəqiqəlik sükut elan etdi. Dövlət Himni səsləndirildi.

Dosent Mobil Məcidov Azərbaycan xalqının Xilaskar oğlu, Ulu Öndər Heydər Əliyevin Azərbaycan xalqının milli müqəddəratının həlli istiqamətindəki xidmətlərindən danışdı. Qeyd etdi ki, Heydər Əliyev Azərbaycan dövlətçiliyi tarixində elə əzəmətli bir mövqeyə malikdir ki, bizim dünənimiz, bu günümüz və işıqlı sabahımızın hər addımında onun dəsti-xətti var. İllər ötsə, nəsillər dəyişsə belə, parlaq əməllərilə özünü xalqının mənəvi yaddaşına yazan Heydər Əliyev daim yaşayacaqdır.

Konfrans öz işini filialın “İctimai, təbiət fənləri və onların tədrisi texnologiyası” kafedrasının müdiri, dosent Baxış Ələsgərovun moderatorluğu ilə davam etdirdi.

Dosent Baxış Ələsgərov Ümummilli Liderimiz Heydər Əliyevin şərəfli ömür yolu və ictimai həyatda qazandığı uğurlardan danışdı. Onun ali diplomatiya sahəsindəki fəaliyyətinin nəticəsi olaraq Azərbaycanda hüquqi-suveren dövlət yaratmaq əzmini və buna nail olmasını uzun illərin gərgin əmək fəaliyyəti nəticəsində ərsəyə gəldiyini bildirdi. Sonra söz məruzəçiyə verildi.

“Ümummilli Lider Heydər Əliyevin milli-mənəvi dəyərlərimizin inkişafında rolu” mövzusunda məruzə edən filialın “İctimai, təbiət fənləri və onların tədrisi texnologiyası” kafedrasının baş müəllimi, tarix üzrə fəlsəfə doktoru Anar Kərimli dünya şöhrətli siyasətçi, xalqının milli-mənəvi dəyərlərinə bütün ictimai-siyasi fəaliyyəti boyunca sədaqət nümayiş etdirən Heydər Əliyevin bu istiqamətdə apardığı məqsədyönlü siyasətdən danışdı. Qeyd etdi ki, Ulu Öndərin elmi-siyasi irsində vətən, xalq, millət sevgisi, milli adət-ənənələrə qayıdış, mənsub olduğu xalqın mənəvi dəyərlərinə hörmət hissi qabarıq şəkildə özünü göstərir. Məruzəçi onu da vurğuladı ki, Heydər Əliyev irsi milli-mənəvi dəyərləri özündə ehtiva edən milli dərslik olaraq öyrənilməli və gənc nəslə layiqincə çatdırılıb mənimsədilməlidir.

Sonra məruzə ətrafında çıxışlar dinlənildi.

Filialın tərbiyə işləri üzrə direktor müavini, dosent Mahir Səlimov,“Pedaqogika, psixologiya və onların tədrisi texnologiyası” kafedrasının müdiri, p.ü.f.d., baş müəllim Tahir Kərimli, filialın “Riyaziyyat, informatika və onların tədrisi texnologiyası” kafedrasının müdiri, dosent Sahib Zeynalov, “Dillər, ədəbiyyat və onların tədrisi texnologiyası” kafedrasının müdiri, dosent Vaqif Allahverdiyev, filialın “Keyfiyyətin təminatı” şöbəsinin müdiri, baş müəllim Qərənfil Rzayeva və Pedaqoji fakültənin tyutoru Pərişan Yolçuzadə çıxış edərək Ulu Öndərin ictimai-siyasi fikir tariximizdəki mövqeyi, onun Azərbaycançılıq ideologiyasına əsaslanan məqsədyönlü siyasəti və zamanın Azərbaycan xalqına bəxş etdiyi bu fenomen düşüncəli siyasi liderin öz işıqlı əməlləri ilə xalqının qəlbində əbədi yaşayacağına inam ifadə etdilər.

Sonda Ulu Öndərin həyatı və ictimai-siyasi fəaliyyətinə həsr olunmuş slayd nümayiş etdirildi.

Xəbərlər

Ümummilli Lider Heydər Əliyevin 100 illik yubileyi ilə əlaqədar dəyirmi masa keçirildi.

10 Mart 2023 Şərh yoxdu

10 mart 2023-cü il tarixdə ADPU-nun Ağcabədi filialında Ümummilli Lider Heydər Əliyevin 100 illik yubileyi ilə əlaqədar dəyirmi masa keçirildi. Dəyirmi masada Azərbaycan Respublikası Milli Məclisinin Aqrar Siyasət Komitəsinin sədri, millət vəkili Tahir Rzayev, Yeni Azərbaycan Partiyası Ağcabədi rayon təşkilatının sədri Rövşən Əhmədov, filialın professor-müəllim heyəti və yüksək nailiyyətli tələbələri iştirak edirdi.

Tədbiri giriş sözü ilə açan filialın direktoru, dosent Mobil Məcidov qonaqları salamladı. Sonra unudulmaz liderimiz Heydər Əliyevin və torpaqlarımızın ərazi bütövlüyü uğrunda canından keçmiş şəhidlərimizin müqəddəs ruhları bir dəqiqəlik sükutla yad edildi. Dövlət Himni səsləndirildi.

Filialın direktoru, dosent Mobil Məcidov xalqımızın layiqli oğlu, Ulu Öndər Heydər Əliyevin Azərbaycan xalqının milli müqəddəratının həlli istiqamətindəki misilsiz xidmətlərindən danışdı. Sonra söz qonaqlara verildi.

Azərbaycan Respublikası Milli Məclisinin Aqrar Siyasət Komitəsinin sədri, millət vəkili Tahir Rzayev çıxış edərək, 2023-cü təqvim ilinin Heydər Əliyev ili kimi qəbul olunmasını Ulu Öndərə sədaqətin bariz nümunəsi kimi qeyd etdi. Bildirdi ki, siyasi fəaliyyəti boyunca Azərbaycan xalqına bağlı olan,  onun müstəqilliyi,  inkişafı və parlaq gələcəyi naminə durmadan çalışan, dövlətçilik ənənələrimizi Azərbaycançılıq ideologiyasının prinsipləri ilə cilalayan Heydər Əliyev irsinin öyrədilməsinin əhəmiyyəti böyükdür. Çünki Azərbaycanın dünəni, bugünü və gələcəyi bu dahi şəxsiyyətin parlaq əməllərinin nəticəsi ilə bilavasitə əlaqədardır. Doğrudur, Azərbaycan xalqının xoşbəxt gələcəyi naminə çalışan çox insanlar olub. Lakin onlar tarixin müxtəlif dönəmlərində müəyyən məsələlərlə yadda qala biliblər. Ulu Öndərimiz Heydər Əliyev isə Azərbaycan xalqının ictimai-siyasi, mədəni-iqtisadi və mənəvi tərəqqisində böyük xidmətləri olan, eyni zamanda memarı olduğu qüdrətli Azərbaycan dövlətinin parlaq gələcəyini təmin edəcək strateji inkişafını növbəti yüzilliyin hədəflərinə planlayan tarixi şəxsiyyət kimi əvəzolunmaz bir simadır.

Tahir Rzayev Heydər Əliyevin özündən sonra yerinə layiqli siyasi varisi qoyub getməsini  onun Azərbaycan xalqına son xidməti kimi vurğuladı. Əminliklə bildirdi ki, Heydər Əliyev siyasətini uğurla davam etdirən, ata vəsiyyətini layiqincə yerinə yetirən Azərbaycan Respublikasının Prezidenti cənab İlham Əliyevin xalqa sədaqətinin mayasında da Heydər Əliyev mənəviyyatının payı var.

Heydər Əliyevin parlaq zəkası, fenomen yaddaşı, xilaskarlıq missiyası və xalqına sədaqətindən danışan Tahir Rzayev belə bir şəxsiyyətin mədəni-mənəvi irsindən bəhrələnməyin zəruriliyi və əhəmiyyətini xüsusilə vurğuladı.

Sonra söz Yeni Azərbaycan Partiyası Ağcabədi rayon təşkilatının sədri Rövşən Əhmədova verildi. O, Heydər Əliyevin siyasi hakimiyyət illərində xalqa xidmətlərindən ürək dolusu danışdı. Tarixi müqayisələrlə fikrini ifadə edən Rövşən Əhmədov bildirdi ki, Heydər Əliyevin siyasi hakimiyyətə gəldiyi hər iki dövrdə Azərbaycanda vəziyyət olduqca acınacaqlı idi. İlk gəlişində ölkəni iqtisadi-mədəni gerilikdən xilas edən Ulu Öndərimiz, ikinci gəlişində xalqımızın Xilaskarı missiyasını həyata keçirdi. 1991-ci ildə Azərbaycan Respublikasının müstəqillik aktı qəbul edilsə də, ölkədaxili siyasi çəkişmələr, iqtisadi gerilik, hərc-mərclik yeni yaranmış müstəqil Azərbaycan Respublikasının taleyini təhlükə qarşısında qoymuşdu. Heydər Əliyevin 1993-cü ildə ölkənin siyasi rəhbərliyinə ikinci gəlişi Azərbaycan xalqının taleyini parçalanmaq, qardaş qırğını və vətəndaş müharibəsindən xilas etdi. Ölkənin ictimai-siyasi həyatında sabitlik yarandı.

Məruzəçi torpaqlarının 20 faizini itirən, minlərlə qaçqın-köçkünü olan bir ölkədə siyasi sabitliyə nail olan Heydər Əliyevin ölkənin iqtisadi inkişafına təkan verən bir sıra islahatlar həyata keçirməsindən də danışdı. Xüsusilə, hərbi sənayenin inkişafı, ordu quruculuğunun həyata keçirilməsi kimi məsələlərin yaxın tariximizdə –  44 günlük Vətən Müharibəsində bəhrə verməsini xüsusilə vurğuladı.

Sonra söz filialın tərbiyə işləri üzrə direktor müavini, dosent Mahir Səlimova verildi. Çıxışına qədim yunan filosofu Aristotelin “Siyasət insanları idarə etmək qabiliyyətidir” deyimi ilə başlayan Mahir Səlimov Heydər Əliyevin siyasi fəlsəfəsindən bəhs edərkən xüsusilə, onun idarəetmə mexanizmindən, ölkəni ən kritik məqamlarda belə ağıl və təmkinlə idarə etməsindən danışdı.

Bildirdi ki, Azərbaycanın geosiyasi cəhətdən strateji əhəmiyyətə malik bir bölgədə yerləşməsini daim ona təhlükə mənbəyi hesab edən siyasi liderimiz ağıllı siyasət yürüdərək inkişaf etmiş ölkələrlə Əsrin Müqaviləsinə imza atdı. Əsrin müqaviləsi Azərbaycanın müstəqilliyinin, iqtisadi inkişafının qarantına çevrildi. Məhz bu siyasətin nəticəsidir ki, 30 ilə yaxın bir dövrdə işğal altına alınmış torpaqlarımız ölkənin iqtisadi-siyasi və hərbi qüdrətinin artması səbəbinə azadlığına qovuşdu.  

Heydər Əliyevin Azərbaycan elminin, təhsilinin inkişafındakı rolu barədə danışmaq üçün söz filialın “Pedaqogika, psixologiya və onların tədrisi texnologiyası” kafedrasının müdiri, p.ü.f.d., baş müəllim Tahir Kərimliyə verildi. O, çıxışına Ümummilli Liderimiz Heydər Əliyevin təhsilə dair fikirlərini ifadə etməklə başladı: “Təhsil millətin gələcəyidir. Məktəb, maarif, təhsil işi ilə həmişə sıx bağlı olmuşam… Hesab edirəm ki, cəmiyyət haradan olursa-olsun, nədən olursa-olsun, kəsib təhsilə xərcləməli, gənc nəslin təhsilinə, müəllimə kömək etməlidir. Bu, mənim prinsipal mövqeyimdir”. 

  Tahir Kərimli Azərbaycanlı olmağı ilə fəxr edən, özünü sadə Azərbaycan vətəndaşı kimi hiss edib müəllim adını bütün adlardan uca tutan Ulu Öndərin müəllimə həmişə yüksək qiymət verməsindən və Azərbaycan Respublikasına rəhbərlik etdiyi bütün dövrlərdə təhsilin, elmin inkişafı üçün bir çox yeniliklər etməsindən danışdı.

Qeyd etdi ki, Ulu Öndər Heydər Əliyev müstəqillik illərində elm və təhsilin inkişafını diqqətdən kənarda qoymamış, elm-təhsil problemlərinə kompleks şəkildə yanaşmışdır. O, təhsil strategiyasının həyata keçirilməsi məqsədilə ciddi tədbirlər həyata keçirmiş, mühüm tarixi fərman və sərəncamlar imzalamışdır.

Ulu Öndərin hakimiyyətə ikinci dəfə gəlişi isə ölkədə sürətli yüksəliş, milli ruhun inkişafı və mənəviyyatın tərəqqisi dövrü kimi yaddaşlara hopub. Xüsusən, gənc nəslin təlim-tərbiyəsi,təhsili və elmi potensialının gücləndirilməsi istiqamətində apardığı daxili siyasət nəticəsində əldə edilən nailiyyətlər danılmazdır.

Təhsilin məzmununun yenilinməsi, xüsusilə Heydər Əliyevin Azərbaycançılıq ideologiyasının təhsilin məzmununa hopmasının nəticəsidir ki, milli düşüncəyə malik vətənpərvər gənclərin yetişməsinə nail ola bildik və həmin gənclər aldıqları təhsil və mənəvi tərbiyənin nəticəsi olaraq 44 günlük Vətən müharibəsində xalqımızın zəfər dastanını yazdılar.  Bu isə, Ümummilli Liderimizin şəninə təriflər qoşduğu Azərbaycan gəncindən gözlədiyi mühüm nəticə kimi çox dəyərlidir.

Heydər Əliyev fenomeninin Azərbaycan ədəbiyyatında poetik dillə ifadəsi barədə danışan filialın “Keyfiyyətin təminatı” şöbəsinin müdiri, baş müəllim Qərənfil Rzayeva dahi şəxsiyyətə həsr olunmuş “Heydər adlı günəş sönməz” şeiri ilə tədbir iştirakçılarına poetik anlar yaşatdı.

Sonda Ümummilli Liderimiz Heydər Əliyevin şərəfli ömür yolu və siyasi fəaliyyətinə həsr olunmuş videolent təqdim olundu.142

Xəbərlər

Gənclər və idman naziri ADPU-nun Ağcabədi filialının tələbələri ilə görüşüb

22 Dekabr 2022 Şərh yoxdu

Bakı, 22 oktyabr, AZƏRTAC

Gənclər və idman naziri Fərid Qayıbov Azərbaycan Dövlət Pedaqoji Universitetinin (ADPU) Ağcabədi filialının tələbələri ilə görüşüb.

ADPU-dan AZƏRTAC-a bildirilib ki, filialın direktoru Mobil Məcidov müəllim-tələbə heyəti adından nazirə təhsil ocağına gəldiyi üçün təşəkkür edib və bu görüşün gənclər üçün faydalı olacağını bildirib.

Görüşdə Fərid Qayıbov gəncləri dinləyib, onların təklif və arzuları ilə maraqlanıb. Tələbələr öz uğurları və fəaliyyətləri barədə danışıb, nazirə müxtəlif mövzularda suallar veriblər. Region gəncləri üçün nazirliyin layihələri haqqında məlumat verilib. Filialın tələbə-gənclər təşkilatı ilə rayon Gənclər və İdman İdarəsi arasında əlaqələrin gücləndirilməsi, müxtəlif təşəbbüslərin birgə həyata keçirilməsi, gənclərin sosial fəaliyyətlərə daha çox cəlb edilməsi və vətənpərvərlik istiqamətlərində fikir mübadiləsi aparılıb.

Elmi Konfranslar Xəbərlər

ADPU-nun Ağcabədi filialında İrəvan Müəllimlər Seminariyasının 140 illiyinə həsr olunmuş elmi-praktik konfrans keçirilib

16 Dekabr 2022 Şərh yoxdu

16 dekabr 2022-ci il tarixdə ADPU-nun Ağcabədi filialında İrəvan Müəllimlər Seminariyasının 140 illiyinə həsr olunmuş “Azərbaycan pedaqoji fikir tarixində İrəvan Müəllimlər Seminariyasının rolu” mövzusunda elmi-praktik konfrans keçirilib. Konfransı giriş sözü ilə açan filialın direktoru dosent Mobil Məcidov İrəvan Müəllimlər Seminariyasının əzəli türk torpaqları olan İrəvan xanlığı ərazisində maarifçiliyin inkişafında əvəzsiz xidmətlərindən danışdı. Bildirdi ki, bu seminariyanın məzunları təkcə Azərbaycan elmi, ədəbiyyatı və mədəniyyətinə deyil, ümumilikdə dünya elminə yüksək töhfələr verib. Təkcə akademik Mustafa bəy Topçubaşovu xatırlatmaq yetərlidir ki, seminariyanın dünya elminə necə yüksək xidmət göstərdiyi aydın olsun. 

İrəvan Müəllimlər Seminariyasının 140 illiyinin qeyd edilməsinin tarixi əhəmiyyətindən danışan dosent Mobil Məcidov, bu təhsil ocağının tarixi varlığını çar Rusiyası dövründə İrəvan quberniyası ərazisində Azərbaycan türklərinin mədəni irsinin mövcudluğunu təsdiqləyən fakt kimi dəyərləndirdi. İrəvan Müəllimlər Seminariyasının varlığı sübut edir ki, Azərbaycan türklərinin əzəli torpaqları, dədə-baba yurdu olan Qərbi Azərbaycanda köklü, əsaslı maarifçilik, elm, təhsil və  mədəniyyət inkişaf etmişdir.

Sonra İrəvan Müəllimlər Seminariyasının fəaliyyətini əks etdirən videoçarx nümayiş etdirildi. Söz məruzəçilərə verildi.

Filialın “Pedaqogika, psixologiya və onların tədrisi texnologiyası” kafedrasının müdiri, pedaqogika üzrə fəlsəfə doktoru, baş müəllim Tahir Kərimlinin “Azərbaycan pedaqoji fikir tarixində İrəvan Müəllimlər Seminariyasının rolu”, həmin kafedrasının baş müəllimi, tarix üzrə fəlsəfə doktoru Əlizadə Nəcəfovun “İrəvan Müəllimlər Seminariyasının Azərbaycanlı müəllim və məzunları”, filialın Tədris və elmi işlər üzrə direktor müavini, dosent Seymur Süleymanovun “Azərbaycanlı müəllim kadrlarının hazırlanmasında İrəvan Müəllimlər Seminariyasının rolu”, filialın Tərbiyə işləri üzrə direktor müavini, dosent Mahir Səlimovun “İrəvan Müəllimlər Seminariyasinın Cənubi  Qafqazda maarifçiliyin  inkişafında rolu”, filialın “Keyfiyyətin təminatı” şöbəsinin müdiri, “Dillər, ədəbiyyat və onların tədrisi texnologiyası” kafedrasının baş müəllimi Qərənfil Rzayevanın “İrəvan pedaqoji mühiti” və filialın “İctimai, təbiət fənləri və onların tədrisi texnologiyası” kafedrasının baş müəllimi, tarix üzrə fəlsəfə doktoru Anar Kərimlinin “XIX əsrin sonu – XX əsrin əvvəllərində İrəvanda kitab nəşri, məktəbdarlıq və tanınmış Azərbaycan ziyalıları” mövzusunda məruzələri dinlənildi.

Sonra məruzələr ətrafında çıxışlar oldu, müzakirələr aparıldı. Konfransın sonunda Azərbaycan Dövlət Pedaqoji Universitetinin professoru Fərrux Rüstəmovun hazırladığı “İrəvan Müəllimlər Seminariyası və onun məzunları” kitabının təqdimat mərasimi keçirildi. Kitabın əhəmiyyətindən danışan çıxışçılar belə tədqiqat işlərinin pedaqoji fikir tariximiz üçün zəruri olduğunu və bir zamanlar Cənubi Qafqazın intellektual mərkəzi olan İrəvan şəhərinin tarixinin araşdırılmasında müstəsna rol oynadığını diqqətə çatdırıblar.

Xəbərlər

12 dekabr ümummilli lider Heydər Əliyevin anım günüdür

12 Dekabr 2022 Şərh yoxdu
Azərbaycan xalqının böyük oğlu Heydər Əlirza oğlu Əliyev 1923-cü il mayın 10-da Naxçıvanda anadan olub. 1944-cü ildən təhlükəsizlik orqanları sistemində çalışan Heydər Əliyev 1964-cü ildən Azərbaycan SSR Nazirlər Soveti yanında Dövlət Təhlükəsizliyi Komitəsi sədrinin müavini, 1967-ci ildən isə sədri vəzifəsində işləyib, general-mayor rütbəsinə qədər yüksəlib. Həmin illərdə o, Leninqradda (Sankt-Peterburq) xüsusi ali təhsil alıb, 1957-ci ildə isə Azərbaycan Dövlət Universitetinin tarix fakültəsini bitirib. 1969-cu il iyul plenumunda Heydər Əliyev Azərbaycan SSR Kommunist Partiyası Mərkəzi Komitəsinin birinci katibi seçilib. 1982-ci ilin dekabrında Heydər Əliyev SSRİ Nazirlər Soveti sədrinin birinci müavini vəzifəsinə təyin edilib və SSRİ-nin rəhbərlərindən biri olub. Heydər Əliyev 1987-ci ilin oktyabrında Sovet İttifaqı Kommunist Partiyası Mərkəzi Komitəsi Siyasi Bürosunun və baş katib Mixail Qorbaçovun yeritdiyi siyasi xəttə etiraz əlaməti olaraq, tutduğu vəzifələrdən istefa verib.
Heydər Əliyevin 1970-1980-ci illərin əvvəllərində gördüyü işlər önəmli rol oynayırdı. Heydər Əliyev 1969-cu ildə Azərbaycana rəhbərlik etməyə başlayanda Azərbaycan Respublikası Sovet İttifaqının müttəfiq respublikaları arasında bütün göstəricilərə görə axırıncı yerlərdə idi. Ulu öndər Heydər Əliyev ölkəyə rəhbərlik etdiyi dövrdə sənaye, o cümlədən yüngül sənaye və kənd təsərrüfatı ən parlaq inkişaf dövrünü yaşamışdır.
1990-cı il yanvarın 21-də Sovet rejiminin qadağalarına rəğmən, həyatını təhlükə qarşısında qoyaraq Azərbaycanın Moskvadakı daimi nümayəndəliyinə gələn ulu öndər Heydər Əliyev qanlı faciənin təşkilatçılarını qarşısında ittiham etdi, ifşaedici və cəsarətli bir bəyanat verdi.
Ulu öndər Heydər Əliyev Dağlıq Qarabağda yaranmış kəskin münaqişəli vəziyyətlə bağlı SSRİ rəhbərliyinin ikiüzlü siyasətinə cavab olaraq, 1991-ci ilin iyulunda Sovet İttifaqı Kommunist Partiyasının sıralarını tərk edib.
1990-cı ilin iyulunda Azərbaycana qayıdan Heydər Əliyev qısa müddət Bakıda qaldıqdan sonra Naxçıvanda yaşayıb, həmin ildə də Azərbaycan Ali Sovetinə deputat seçilib. O, 1991-1993-cü illərdə Naxçıvan Muxtar Respublikası Ali Məclisinin sədri, Azərbaycan Respublikasının Ali Soveti sədrinin müavini olub.
Ümummilli partiyaya sədr seçilməklə ulu öndər böyük siyasətə qayıdan Heydər Əliyev 1992-ci ildə Yeni Azərbaycan Partiyasının Naxçıvan şəhərində keçirilmiş təsis qurultayında partiyanın sədri seçilib. Ulu Öndərin təcrübəsi və siyasi peşəkarlığı sayəsində YAP ölkənin ən böyük və effektiv siyasi qüvvəsinə çevrilmişdir. Partiya Heydər Əliyevin ətrafında yaradılmışdır, onun siyasi təcrübəsi, bilikləri, xalq qarşısında göstərdiyi xidmətlər, çalışdığı dövrdə göstərdiyi əsl vətənpərvərlik və öz xalqına olan sadiqlik Azərbaycanın mütərəqqi insanlarını onun ətrafında birləşdirdi.
1993-cü il oktyabrın 3-də ümumxalq səsverməsi nəticəsində Heydər Əliyev Azərbaycan Respublikasının Prezidenti seçilib. Ulu Öndər Heydər Əliyevin 1993-cü ildə Prezident seçilməsi Azərbaycan xalqını qurtuluşa aparan yolun ilk addımıdır. Ulu öndər 1993-cü il oktyabrın 10-da dövlətə və xalqa sədaqət andı içərək Azərbaycanı böyük bəlalardan, faciələrdən hifz edib, ölkəni sabitlik, iqtisadi inkişaf və tərəqqi yoluna çıxarıb, qlobal enerji-kommunikasiya layihələrini reallaşdırmaqla Vətənə sədaqətlə xidmətin əyani nümunəsini yaratdı. O, 1998-ci il oktyabrın 11-də keçirilən növbəti prezident seçkilərində yenidən Azərbaycan Respublikasının Prezidenti seçildi.
Azərbaycan xalqı haqlı olaraq Heydər Əliyevi Azərbaycan dövlət müstəqilliyinin qurucusu kimi qəbul edir. Onun rəhbərliyi altında dövlətçiliyin əsasları qoyuldu və ciddi islahatlara start verildi. Azərbaycan beynəlxalq aləmdə öz möhkəm yerini tuta bildi. Ən ağır məqamlarda Azərbaycan xalqı əmin idi ki, Heydər Əliyev müstəqilliyi, dövlət maraqlarını, xalqımızın, dövlətimizin maraqlarını qoruyacaq və xalqımızın inkişafı ilə bağlı ən düzgün qərar verəcəkdir. Xalqla iqtidar arasındakı birlik ölkənin uğurlarının əsas səbəbidir.
​Azərbaycan Xalq Cümhuriyyətinin üçrəngli Dövlət bayrağı 1990-cı il noyabrın 17-də Naxçıvan Muxtar Respublikası Ali Məclisinin sədri, xalqımızın ümummilli lideri Heydər Əliyevin təşəbbüsü və rəhbərliyi ilə keçirilən sessiyada Naxçıvan Muxtar Respublikasının dövlət bayrağı olaraq təsdiq edilmişdir. Naxçıvan Muxtar Respublikasının Ali Məclisi Azərbaycan SSR Ali Soveti qarşısında üçrəngli bayrağın Azərbaycanın rəsmi dövlət rəmzi kimi tanınması haqqında vəsatət qaldırmışdır. Milli dövlətçilik ənənələrinin bərpası və dirçəlişi üçün bir çox mühüm addımlar atılmışdır.
“Əsrin müqaviləsi” 1994-cü ilin sentyabr ayının 20-də Azərbaycanın Dövlət Neft Şirkəti ilə 6 ölkənin 10 şirkəti arasında bağlanmışdır. “Əsrin müqaviləsi” həm karbohidrogen ehtiyatlarının miqdarına, həm də qoyulan sərmayələrin həcminə görə dünyada bağlanan ən iri sazişlər siyahısına daxil olmuşdur. “Əsrin müqaviləsi” Azərbaycanın dünya iqtisadi sistemindəki yerini müəyyənləşdirmişdir. Həmin müqavilə daha sonra 19 ölkənin 41 neft şirkəti ilə 26 müqavilənin imzalanmasına yol açmışdır. Ulu öndər Heydər Əliyev demişdi: “Əsrin müqaviləsi ilə qoyduğumuz təməl XXI əsrdə Azərbaycan xalqının inkişafı, firavan həyatı, müstəqil Azərbaycan dövlətinin suverenliyinin daha da möhkəmlənməsi üçün gözəl imkanlar yaradır və inanıram ki, XXI əsr müstəqil Azərbaycan dövləti üçün ən xoşbəxt dövr olacaqdır.”
1993-2003-cü illərdə Azərbaycanın sürətli inkişafı bugünkü reallıqların bünövrəsidir. Həmin illərdə görülmüş işlər sayəsində Azərbaycan inkişaf yoluna qədəm qoydu, beynəlxalq aləmdə daxili siyasətlə bağlı bütün məsələlərdə öz prinsipial mövqeyini nümayiş etdirdi, dünyada böyük hörmətə malik oldu. Ölkə daxilində başlanan islahatlar dövlətimiz üçün həlledici rol oynamışdır.
“İşğal olunmuş bütün regionlardan didərgin düşmüş, indi qaçqın vəziyyətində, köçkün vəziyyətində yaşayan vətəndaşların problemləri bizim üçün və şəxsən mənim üçün bir nömrəli problemdir” – Ulu öndər Heydər Əliyev. Onların problemlərinin həlli ilə bağlı həyata keçirilən ilk tədbirlər, hazırlanan Proqramlar ulu öndərin gərgin əməyinin nəticəsidir. Ulu öndər qaçqın və məcburi köçkünlərin məskunlaşdığı ərazilərə daim baş çəkirdi, xarici səfərləri zamanı onların vəziyyətinin dünya ictimaiyyətinə çatdırılmasına çalışırdı. Ölkəyə gələn bütün nümayəndə heyətlərinin rəhbərlərinin, xarici ölkələrin başçılarının məcburi köçkünlərin yaşayış tərzi ilə mütləq tanış olmaları ulu öndər tərəfindən bir vəzifə kimi qarşıya qoyulmuşdu. Onların yaşayış şəraitinin daha da yaxşılaşdırılması, ağır vəziyyətdə yaşadıqları çadır düşərgələrinin ləğvi üçün konkret addımlar atılırdı.
Ulu öndər güclü xarizmatik şəxsiyyət, fenomenal siyasətçi və dövlət xadimi idi. Heydər Əliyevin ən böyük gücü dərin, universal biliyində, qətiyyətində, işgüzarlığında, hökmündə, qeyri-adi yaddaşında, tükənməz səbrində, müsahibini təmkinlə dinləmək bacarığında, uzaqgörənliyində, qarşısına qoyduğu məsələni həyata keçirmək qabiliyyətində, müdrikliyində, siyasətçi keyfiyyətlərində, mahir diplomat olmasında, həmsöhbətinə təsir etmək gücünə malik olmasında idi.
Azərbaycan xalqının ümummilli lideri yüksək bəşəri keyfiyyətlərə, təvazökarlığa, hər şeydən öncə isə demokratik dövlət quruculuğu prinsiplərinə daim sadiq qalan böyük şəxsiyyət idi. Onun xalq işinə sədaqəti, siyasi müdrikliyi, böyük dövlətçilik təcrübəsi, parlaq hafizəsi, geniş dünyagörüşü, polad iradəsi, mərdanə qətiyyəti, həssas qəlbi, möhkəm səbri, çox hövsələliyi, ədalətli olması, həmişə obyektiv mövqe tutması, yüksək intellekti və ziyalı mövqeyi, dolğun tədbirliliyi və analitik təfəkkürü, sadə davranışı bir dövlət başçısı kimi onun ən yüksək keyfiyyətlərdəndir.
Söz azadlığı və demokratik ənənələrin dərinləşməsinə xidmət edən tarixi qərar. Ulu öndər Heydər Əliyevin 1998-ci il 6 avqust tarixli “Azərbaycan Respublikasında söz, fikir və məlumat azadlığının təmin edilməsi sahəsində əlavə tədbirlər haqqında” fərmanı ilə ölkədə kütləvi informasiya vasitələri üzərində senzura ləğv edilib. Sözügedən fərman kütləvi informasiya vasitələrinin ölkədə sürətli inkişafını təmin edən əsas amillərdən birinə çevrildi. Ulu öndər Heydər Əliyevin mətbuat işçiləri ilə mütəmadi təşkil olunan görüşləri və onun mövcud istiqamətdəki institusional təşəbbüsləri mətbuatın davamlı inkişafına səbəb olmuşdur. Milli mətbuatın inkişafına göstərilən dəstəyə görə Ulu Öndər Heydər Əliyev 2002-ci ildə Azərbaycan Jurnalistləri Müdafiə Komitəsi tərəfindən təsis olunmuş “Jurnalistlərin dostu” mükafatına layiq görülmüşlər.
Yalnız Heydər Əliyevin 1969-cu ildə hakimiyyətə gəlişindən sonra onun müstəsna xidmətləri sayəsində ölkəmizdə hərbi kadrların hazırlanması prosesi başlandı. Heydər Əliyev 1971-ci ildə görkəmli sərkərdə Cəmşid Naxçıvanskinin adını daşıyan hərbi liseyin yaradılmasına nail oldu. Ulu öndər Heydər Əliyev hərbi təhsil sisteminin daha da inkişaf etdirilməsi məqsədi ilə 1999-cu il yanvarın 20-də Azərbaycan Respublikası Silahlı Qüvvələrinin Hərbi Akademiyasının yaradılması haqqında fərman imzalamışdır. Akademiyanın təsis olunması hərb sahəsində milli kadr ehtiyatının formalaşdırılması prosesinin keyfiyyət etibarı ilə yeni inkişaf mərhələsi sayıla bilər. 2001-ci il 20 avqust tarixli fərmanı ilə Silahlı Qüvvələr üçün kadr hazırlığının təkmilləşdirilməsi məqsədilə Müdafiə Nazirliyi sistemində fəaliyyət göstərən məktəblər Azərbaycan Ali Hərbi Dənizçilik Məktəbi və Azərbaycan Ali Hərbi Təyyarəçilik Məktəbi adlandırılmış və bununla həmin təhsil ocaqlarının respublika üzrə hərbi təhsil müəssisələri sistemində statusu yüksəldilmişdir.
Azərbaycan dilinin işlənməsi və inkişaf etdirilməsi məsələsinə xüsusi önəm yetirən ümummilli lider Azərbaycan dilinin adını özümüzə qaytarmışdır. 1995-ci ildə Azərbaycan Respublikasının Konstitusiyası hazırlanarkən dövlət dilinin necə adlandırılması ilə bağlı müxtəlif təkliflər irəli sürülmüşdür. Bu təkliflərin çox böyük əksəriyyətində ana dilimizin Azərbaycan dili adlandırılması dəstəklənirdi. Geniş müzakirələrdən sonra 1995-ci ildə ümumxalq səsverməsi yolu ilə qəbul olunmuş Konstitusiyanın 21-ci maddəsində Azərbaycan Respublikasının dövlət dilinin Azərbaycan dili olması öz əksini tapmışdır. Bundan sonra ana dilimizin inkişafı və qorunması işi daha da gücləndirilmişdir.
Millətin məhəbbətini qazanmış ümummilli lider Heydər Əliyev Azərbaycan xalqının yaddaşında qurucu və xilaskar dövlət xadimi kimi əbədi olaraq yaşayacaqdır. Uzun müddət ABŞ-ın Klivlend klinikasında müalicə olunan Heydər Əliyev 2003-cü il dekabrın 12-də dünyasını dəyişdi. Onun əziz xatirəsi qədirbilən xalqımızın yaddaşında özünə əbədi məskən saldı. Xalqımızın böyük oğlu, əsl azərbaycanlı Heydər Əliyevin vəfatından illər ötsə də o, həmişə, hər yerdə xalqımız tərəfindən hörmətlə yad edilir.
1 … 14 15 16 17