Elmi Konfranslar Xəbərlər

ADPU-nun Ağcabədi filialında İrəvan Müəllimlər Seminariyasının 140 illiyinə həsr olunmuş elmi-praktik konfrans keçirilib

16 Dekabr 2022 Şərh yoxdu

16 dekabr 2022-ci il tarixdə ADPU-nun Ağcabədi filialında İrəvan Müəllimlər Seminariyasının 140 illiyinə həsr olunmuş “Azərbaycan pedaqoji fikir tarixində İrəvan Müəllimlər Seminariyasının rolu” mövzusunda elmi-praktik konfrans keçirilib. Konfransı giriş sözü ilə açan filialın direktoru dosent Mobil Məcidov İrəvan Müəllimlər Seminariyasının əzəli türk torpaqları olan İrəvan xanlığı ərazisində maarifçiliyin inkişafında əvəzsiz xidmətlərindən danışdı. Bildirdi ki, bu seminariyanın məzunları təkcə Azərbaycan elmi, ədəbiyyatı və mədəniyyətinə deyil, ümumilikdə dünya elminə yüksək töhfələr verib. Təkcə akademik Mustafa bəy Topçubaşovu xatırlatmaq yetərlidir ki, seminariyanın dünya elminə necə yüksək xidmət göstərdiyi aydın olsun. 

İrəvan Müəllimlər Seminariyasının 140 illiyinin qeyd edilməsinin tarixi əhəmiyyətindən danışan dosent Mobil Məcidov, bu təhsil ocağının tarixi varlığını çar Rusiyası dövründə İrəvan quberniyası ərazisində Azərbaycan türklərinin mədəni irsinin mövcudluğunu təsdiqləyən fakt kimi dəyərləndirdi. İrəvan Müəllimlər Seminariyasının varlığı sübut edir ki, Azərbaycan türklərinin əzəli torpaqları, dədə-baba yurdu olan Qərbi Azərbaycanda köklü, əsaslı maarifçilik, elm, təhsil və  mədəniyyət inkişaf etmişdir.

Sonra İrəvan Müəllimlər Seminariyasının fəaliyyətini əks etdirən videoçarx nümayiş etdirildi. Söz məruzəçilərə verildi.

Filialın “Pedaqogika, psixologiya və onların tədrisi texnologiyası” kafedrasının müdiri, pedaqogika üzrə fəlsəfə doktoru, baş müəllim Tahir Kərimlinin “Azərbaycan pedaqoji fikir tarixində İrəvan Müəllimlər Seminariyasının rolu”, həmin kafedrasının baş müəllimi, tarix üzrə fəlsəfə doktoru Əlizadə Nəcəfovun “İrəvan Müəllimlər Seminariyasının Azərbaycanlı müəllim və məzunları”, filialın Tədris və elmi işlər üzrə direktor müavini, dosent Seymur Süleymanovun “Azərbaycanlı müəllim kadrlarının hazırlanmasında İrəvan Müəllimlər Seminariyasının rolu”, filialın Tərbiyə işləri üzrə direktor müavini, dosent Mahir Səlimovun “İrəvan Müəllimlər Seminariyasinın Cənubi  Qafqazda maarifçiliyin  inkişafında rolu”, filialın “Keyfiyyətin təminatı” şöbəsinin müdiri, “Dillər, ədəbiyyat və onların tədrisi texnologiyası” kafedrasının baş müəllimi Qərənfil Rzayevanın “İrəvan pedaqoji mühiti” və filialın “İctimai, təbiət fənləri və onların tədrisi texnologiyası” kafedrasının baş müəllimi, tarix üzrə fəlsəfə doktoru Anar Kərimlinin “XIX əsrin sonu – XX əsrin əvvəllərində İrəvanda kitab nəşri, məktəbdarlıq və tanınmış Azərbaycan ziyalıları” mövzusunda məruzələri dinlənildi.

Sonra məruzələr ətrafında çıxışlar oldu, müzakirələr aparıldı. Konfransın sonunda Azərbaycan Dövlət Pedaqoji Universitetinin professoru Fərrux Rüstəmovun hazırladığı “İrəvan Müəllimlər Seminariyası və onun məzunları” kitabının təqdimat mərasimi keçirildi. Kitabın əhəmiyyətindən danışan çıxışçılar belə tədqiqat işlərinin pedaqoji fikir tariximiz üçün zəruri olduğunu və bir zamanlar Cənubi Qafqazın intellektual mərkəzi olan İrəvan şəhərinin tarixinin araşdırılmasında müstəsna rol oynadığını diqqətə çatdırıblar.

Xəbərlər

12 dekabr ümummilli lider Heydər Əliyevin anım günüdür

12 Dekabr 2022 Şərh yoxdu
Azərbaycan xalqının böyük oğlu Heydər Əlirza oğlu Əliyev 1923-cü il mayın 10-da Naxçıvanda anadan olub. 1944-cü ildən təhlükəsizlik orqanları sistemində çalışan Heydər Əliyev 1964-cü ildən Azərbaycan SSR Nazirlər Soveti yanında Dövlət Təhlükəsizliyi Komitəsi sədrinin müavini, 1967-ci ildən isə sədri vəzifəsində işləyib, general-mayor rütbəsinə qədər yüksəlib. Həmin illərdə o, Leninqradda (Sankt-Peterburq) xüsusi ali təhsil alıb, 1957-ci ildə isə Azərbaycan Dövlət Universitetinin tarix fakültəsini bitirib. 1969-cu il iyul plenumunda Heydər Əliyev Azərbaycan SSR Kommunist Partiyası Mərkəzi Komitəsinin birinci katibi seçilib. 1982-ci ilin dekabrında Heydər Əliyev SSRİ Nazirlər Soveti sədrinin birinci müavini vəzifəsinə təyin edilib və SSRİ-nin rəhbərlərindən biri olub. Heydər Əliyev 1987-ci ilin oktyabrında Sovet İttifaqı Kommunist Partiyası Mərkəzi Komitəsi Siyasi Bürosunun və baş katib Mixail Qorbaçovun yeritdiyi siyasi xəttə etiraz əlaməti olaraq, tutduğu vəzifələrdən istefa verib.
Heydər Əliyevin 1970-1980-ci illərin əvvəllərində gördüyü işlər önəmli rol oynayırdı. Heydər Əliyev 1969-cu ildə Azərbaycana rəhbərlik etməyə başlayanda Azərbaycan Respublikası Sovet İttifaqının müttəfiq respublikaları arasında bütün göstəricilərə görə axırıncı yerlərdə idi. Ulu öndər Heydər Əliyev ölkəyə rəhbərlik etdiyi dövrdə sənaye, o cümlədən yüngül sənaye və kənd təsərrüfatı ən parlaq inkişaf dövrünü yaşamışdır.
1990-cı il yanvarın 21-də Sovet rejiminin qadağalarına rəğmən, həyatını təhlükə qarşısında qoyaraq Azərbaycanın Moskvadakı daimi nümayəndəliyinə gələn ulu öndər Heydər Əliyev qanlı faciənin təşkilatçılarını qarşısında ittiham etdi, ifşaedici və cəsarətli bir bəyanat verdi.
Ulu öndər Heydər Əliyev Dağlıq Qarabağda yaranmış kəskin münaqişəli vəziyyətlə bağlı SSRİ rəhbərliyinin ikiüzlü siyasətinə cavab olaraq, 1991-ci ilin iyulunda Sovet İttifaqı Kommunist Partiyasının sıralarını tərk edib.
1990-cı ilin iyulunda Azərbaycana qayıdan Heydər Əliyev qısa müddət Bakıda qaldıqdan sonra Naxçıvanda yaşayıb, həmin ildə də Azərbaycan Ali Sovetinə deputat seçilib. O, 1991-1993-cü illərdə Naxçıvan Muxtar Respublikası Ali Məclisinin sədri, Azərbaycan Respublikasının Ali Soveti sədrinin müavini olub.
Ümummilli partiyaya sədr seçilməklə ulu öndər böyük siyasətə qayıdan Heydər Əliyev 1992-ci ildə Yeni Azərbaycan Partiyasının Naxçıvan şəhərində keçirilmiş təsis qurultayında partiyanın sədri seçilib. Ulu Öndərin təcrübəsi və siyasi peşəkarlığı sayəsində YAP ölkənin ən böyük və effektiv siyasi qüvvəsinə çevrilmişdir. Partiya Heydər Əliyevin ətrafında yaradılmışdır, onun siyasi təcrübəsi, bilikləri, xalq qarşısında göstərdiyi xidmətlər, çalışdığı dövrdə göstərdiyi əsl vətənpərvərlik və öz xalqına olan sadiqlik Azərbaycanın mütərəqqi insanlarını onun ətrafında birləşdirdi.
1993-cü il oktyabrın 3-də ümumxalq səsverməsi nəticəsində Heydər Əliyev Azərbaycan Respublikasının Prezidenti seçilib. Ulu Öndər Heydər Əliyevin 1993-cü ildə Prezident seçilməsi Azərbaycan xalqını qurtuluşa aparan yolun ilk addımıdır. Ulu öndər 1993-cü il oktyabrın 10-da dövlətə və xalqa sədaqət andı içərək Azərbaycanı böyük bəlalardan, faciələrdən hifz edib, ölkəni sabitlik, iqtisadi inkişaf və tərəqqi yoluna çıxarıb, qlobal enerji-kommunikasiya layihələrini reallaşdırmaqla Vətənə sədaqətlə xidmətin əyani nümunəsini yaratdı. O, 1998-ci il oktyabrın 11-də keçirilən növbəti prezident seçkilərində yenidən Azərbaycan Respublikasının Prezidenti seçildi.
Azərbaycan xalqı haqlı olaraq Heydər Əliyevi Azərbaycan dövlət müstəqilliyinin qurucusu kimi qəbul edir. Onun rəhbərliyi altında dövlətçiliyin əsasları qoyuldu və ciddi islahatlara start verildi. Azərbaycan beynəlxalq aləmdə öz möhkəm yerini tuta bildi. Ən ağır məqamlarda Azərbaycan xalqı əmin idi ki, Heydər Əliyev müstəqilliyi, dövlət maraqlarını, xalqımızın, dövlətimizin maraqlarını qoruyacaq və xalqımızın inkişafı ilə bağlı ən düzgün qərar verəcəkdir. Xalqla iqtidar arasındakı birlik ölkənin uğurlarının əsas səbəbidir.
​Azərbaycan Xalq Cümhuriyyətinin üçrəngli Dövlət bayrağı 1990-cı il noyabrın 17-də Naxçıvan Muxtar Respublikası Ali Məclisinin sədri, xalqımızın ümummilli lideri Heydər Əliyevin təşəbbüsü və rəhbərliyi ilə keçirilən sessiyada Naxçıvan Muxtar Respublikasının dövlət bayrağı olaraq təsdiq edilmişdir. Naxçıvan Muxtar Respublikasının Ali Məclisi Azərbaycan SSR Ali Soveti qarşısında üçrəngli bayrağın Azərbaycanın rəsmi dövlət rəmzi kimi tanınması haqqında vəsatət qaldırmışdır. Milli dövlətçilik ənənələrinin bərpası və dirçəlişi üçün bir çox mühüm addımlar atılmışdır.
“Əsrin müqaviləsi” 1994-cü ilin sentyabr ayının 20-də Azərbaycanın Dövlət Neft Şirkəti ilə 6 ölkənin 10 şirkəti arasında bağlanmışdır. “Əsrin müqaviləsi” həm karbohidrogen ehtiyatlarının miqdarına, həm də qoyulan sərmayələrin həcminə görə dünyada bağlanan ən iri sazişlər siyahısına daxil olmuşdur. “Əsrin müqaviləsi” Azərbaycanın dünya iqtisadi sistemindəki yerini müəyyənləşdirmişdir. Həmin müqavilə daha sonra 19 ölkənin 41 neft şirkəti ilə 26 müqavilənin imzalanmasına yol açmışdır. Ulu öndər Heydər Əliyev demişdi: “Əsrin müqaviləsi ilə qoyduğumuz təməl XXI əsrdə Azərbaycan xalqının inkişafı, firavan həyatı, müstəqil Azərbaycan dövlətinin suverenliyinin daha da möhkəmlənməsi üçün gözəl imkanlar yaradır və inanıram ki, XXI əsr müstəqil Azərbaycan dövləti üçün ən xoşbəxt dövr olacaqdır.”
1993-2003-cü illərdə Azərbaycanın sürətli inkişafı bugünkü reallıqların bünövrəsidir. Həmin illərdə görülmüş işlər sayəsində Azərbaycan inkişaf yoluna qədəm qoydu, beynəlxalq aləmdə daxili siyasətlə bağlı bütün məsələlərdə öz prinsipial mövqeyini nümayiş etdirdi, dünyada böyük hörmətə malik oldu. Ölkə daxilində başlanan islahatlar dövlətimiz üçün həlledici rol oynamışdır.
“İşğal olunmuş bütün regionlardan didərgin düşmüş, indi qaçqın vəziyyətində, köçkün vəziyyətində yaşayan vətəndaşların problemləri bizim üçün və şəxsən mənim üçün bir nömrəli problemdir” – Ulu öndər Heydər Əliyev. Onların problemlərinin həlli ilə bağlı həyata keçirilən ilk tədbirlər, hazırlanan Proqramlar ulu öndərin gərgin əməyinin nəticəsidir. Ulu öndər qaçqın və məcburi köçkünlərin məskunlaşdığı ərazilərə daim baş çəkirdi, xarici səfərləri zamanı onların vəziyyətinin dünya ictimaiyyətinə çatdırılmasına çalışırdı. Ölkəyə gələn bütün nümayəndə heyətlərinin rəhbərlərinin, xarici ölkələrin başçılarının məcburi köçkünlərin yaşayış tərzi ilə mütləq tanış olmaları ulu öndər tərəfindən bir vəzifə kimi qarşıya qoyulmuşdu. Onların yaşayış şəraitinin daha da yaxşılaşdırılması, ağır vəziyyətdə yaşadıqları çadır düşərgələrinin ləğvi üçün konkret addımlar atılırdı.
Ulu öndər güclü xarizmatik şəxsiyyət, fenomenal siyasətçi və dövlət xadimi idi. Heydər Əliyevin ən böyük gücü dərin, universal biliyində, qətiyyətində, işgüzarlığında, hökmündə, qeyri-adi yaddaşında, tükənməz səbrində, müsahibini təmkinlə dinləmək bacarığında, uzaqgörənliyində, qarşısına qoyduğu məsələni həyata keçirmək qabiliyyətində, müdrikliyində, siyasətçi keyfiyyətlərində, mahir diplomat olmasında, həmsöhbətinə təsir etmək gücünə malik olmasında idi.
Azərbaycan xalqının ümummilli lideri yüksək bəşəri keyfiyyətlərə, təvazökarlığa, hər şeydən öncə isə demokratik dövlət quruculuğu prinsiplərinə daim sadiq qalan böyük şəxsiyyət idi. Onun xalq işinə sədaqəti, siyasi müdrikliyi, böyük dövlətçilik təcrübəsi, parlaq hafizəsi, geniş dünyagörüşü, polad iradəsi, mərdanə qətiyyəti, həssas qəlbi, möhkəm səbri, çox hövsələliyi, ədalətli olması, həmişə obyektiv mövqe tutması, yüksək intellekti və ziyalı mövqeyi, dolğun tədbirliliyi və analitik təfəkkürü, sadə davranışı bir dövlət başçısı kimi onun ən yüksək keyfiyyətlərdəndir.
Söz azadlığı və demokratik ənənələrin dərinləşməsinə xidmət edən tarixi qərar. Ulu öndər Heydər Əliyevin 1998-ci il 6 avqust tarixli “Azərbaycan Respublikasında söz, fikir və məlumat azadlığının təmin edilməsi sahəsində əlavə tədbirlər haqqında” fərmanı ilə ölkədə kütləvi informasiya vasitələri üzərində senzura ləğv edilib. Sözügedən fərman kütləvi informasiya vasitələrinin ölkədə sürətli inkişafını təmin edən əsas amillərdən birinə çevrildi. Ulu öndər Heydər Əliyevin mətbuat işçiləri ilə mütəmadi təşkil olunan görüşləri və onun mövcud istiqamətdəki institusional təşəbbüsləri mətbuatın davamlı inkişafına səbəb olmuşdur. Milli mətbuatın inkişafına göstərilən dəstəyə görə Ulu Öndər Heydər Əliyev 2002-ci ildə Azərbaycan Jurnalistləri Müdafiə Komitəsi tərəfindən təsis olunmuş “Jurnalistlərin dostu” mükafatına layiq görülmüşlər.
Yalnız Heydər Əliyevin 1969-cu ildə hakimiyyətə gəlişindən sonra onun müstəsna xidmətləri sayəsində ölkəmizdə hərbi kadrların hazırlanması prosesi başlandı. Heydər Əliyev 1971-ci ildə görkəmli sərkərdə Cəmşid Naxçıvanskinin adını daşıyan hərbi liseyin yaradılmasına nail oldu. Ulu öndər Heydər Əliyev hərbi təhsil sisteminin daha da inkişaf etdirilməsi məqsədi ilə 1999-cu il yanvarın 20-də Azərbaycan Respublikası Silahlı Qüvvələrinin Hərbi Akademiyasının yaradılması haqqında fərman imzalamışdır. Akademiyanın təsis olunması hərb sahəsində milli kadr ehtiyatının formalaşdırılması prosesinin keyfiyyət etibarı ilə yeni inkişaf mərhələsi sayıla bilər. 2001-ci il 20 avqust tarixli fərmanı ilə Silahlı Qüvvələr üçün kadr hazırlığının təkmilləşdirilməsi məqsədilə Müdafiə Nazirliyi sistemində fəaliyyət göstərən məktəblər Azərbaycan Ali Hərbi Dənizçilik Məktəbi və Azərbaycan Ali Hərbi Təyyarəçilik Məktəbi adlandırılmış və bununla həmin təhsil ocaqlarının respublika üzrə hərbi təhsil müəssisələri sistemində statusu yüksəldilmişdir.
Azərbaycan dilinin işlənməsi və inkişaf etdirilməsi məsələsinə xüsusi önəm yetirən ümummilli lider Azərbaycan dilinin adını özümüzə qaytarmışdır. 1995-ci ildə Azərbaycan Respublikasının Konstitusiyası hazırlanarkən dövlət dilinin necə adlandırılması ilə bağlı müxtəlif təkliflər irəli sürülmüşdür. Bu təkliflərin çox böyük əksəriyyətində ana dilimizin Azərbaycan dili adlandırılması dəstəklənirdi. Geniş müzakirələrdən sonra 1995-ci ildə ümumxalq səsverməsi yolu ilə qəbul olunmuş Konstitusiyanın 21-ci maddəsində Azərbaycan Respublikasının dövlət dilinin Azərbaycan dili olması öz əksini tapmışdır. Bundan sonra ana dilimizin inkişafı və qorunması işi daha da gücləndirilmişdir.
Millətin məhəbbətini qazanmış ümummilli lider Heydər Əliyev Azərbaycan xalqının yaddaşında qurucu və xilaskar dövlət xadimi kimi əbədi olaraq yaşayacaqdır. Uzun müddət ABŞ-ın Klivlend klinikasında müalicə olunan Heydər Əliyev 2003-cü il dekabrın 12-də dünyasını dəyişdi. Onun əziz xatirəsi qədirbilən xalqımızın yaddaşında özünə əbədi məskən saldı. Xalqımızın böyük oğlu, əsl azərbaycanlı Heydər Əliyevin vəfatından illər ötsə də o, həmişə, hər yerdə xalqımız tərəfindən hörmətlə yad edilir.
Xəbərlər

ADPU-nun Ağcabədi filialında Azərbaycanın milli istiqlal şairi Əhməd Cavadın anadan olmasının 130 illik yubiley tədbiri keçirilib

25 Noyabr 2022 Şərh yoxdu

24 noyabr 2022-ci il tarixdə ADPU-nun Ağcabədi filialında görkəmli Azərbaycan şairi və ictimai xadimi Əhməd Cavadın anadan olmasının 130 illik yubiley tədbiri keçirildi.
Tədbiri giriş sözü ilə açan filialın direktoru, dosent Mobil Məcidov Azərbaycan dövlətçiliyi və ədəbiyyatı tarixində milli istiqlal şairi kimi tanınan Əhməd Cavadın yüksək vətənpərvərlik qayəsindən, xalqa, dövlətçiliyimizə sədaqətindən qürur hissi ilə danışdı. Qeyd etdi ki, Əhməd Cavad M.F.Axundzadə, H.Zərdabi, M.Ə.Rəsulzadə, Ə.Topçubaşov, C.Məmmədquluzadə, M.Ə.Sabir, M.Hadi, H.Cavid və başqaları ilə başlayan Azərbaycan milli istiqlal ideyası və türkçülük məfkurəsinin davamçısıdır. Onun adının milli azadlıq və istiqlal ideyaları ilə möhkəm bağlılığının nəticəsidir ki, Azərbaycan Respublikasının prezidenti cənab İlham Əliyev 20 aprel 2022-ci il tarixdə görkəmli sənətkarın anadan olmasının 130 illiyinin respublika səviyyəsində qeyd edilməsi ilə bağlı Sərəncam imzalayıb. Sərəncamda Əhməd Cavad görkəmli şair, maarifçi və ictimai xadim, Azərbaycan poeziyasında yeni bir ədəbi məktəbin təməlçisi, milli azadlıq və istiqlal uğrunda mübariz, yaradıcılığı dövrün ictimai-siyasi mənzərəsini dolğun əks etdirən sənətkar kimi qiymətləndirilir.
Sonra tədbiri idarə etmək üçün söz, filialın “Dillər, ədəbiyyat və onların tədrisi texnologiyası” kafedrasının müdiri, dosent Vaqif Allahverdiyevə verildi.
Əhməd Cavadın ədəbi şəxsiyyəti, yaradıcılığındakı ümumtürk məramından danışan dosent Vaqif Allahverdiyev, onun Şərqdə ilk cümhuriyyət olan Azərbaycan Xalq Cümhuriyyətinin Milli Dövlət Himni mətninin müəllifi kimi xalqın mənəvi yaddaşında əbədi yaşayacağına əminlik hissi ifadə etdi.
Sonra söz məruzəçilərə verildi.
“Əhməd Cavadın yaradıcılıq yolu” mövzusunda məruzə edən dosent Mətanət Fərzəliyeva Əhməd Cavad poeziyasının ideya-bədii, dili və üslub xüsusiyyətlərindən bəhs etdi.
“Əhməd Cavadın dövrü və həyatı” mövzusunda məruzə edən filialın gənc müəllimi Maya Abdullayeva şairin həyatı, dövrü və onu yüksək amallar şairi kimi yetişdirən ictimai-siyasi mühitin amillərindən danışdı. Müsavat partiyası, Gəncə təşkilatının 1920-ci illərə qədərki fəaliyyəti, Azərbaycan Xalq Cümhuriyyətinin milli mübarizəsinin Gəncə mühiti, Birinci Dünya müharibəsi ərəfəsi Rusiyada və Azərbaycanda iqtisadi vəziyyətin pisləşməsi, müharibənin başlanması, rus-erməni təxribatları, xalqın təşkilatlanması, Gəncədə “Difai”, “Müdafiə”, “Aləmi-mərkəziyyə” kimi milli-siyasi təşkilatların yaranması, ermənilərin Anadoluya dolması, türk kəndlərində qırğınların törədilməsi, türk hökumətinin onları yeni yaşayış yerlərinə köçürmələri, türklərin qaçqın həyatı, Batumda qaçqınlara yardım komitəsinin yaradılması, Ə.Cavadın türk qaçqınlarına kömək cəmiyyətini təşkil etməsi – bütün bunlar Ə.Cavadı ictimai-siyasi və ədəbi-mədəni mühitə gətirib çıxaran amillər olaraq dəyərləndirildi.
Məruzələr dinlənildikdən sonra filialın Pedaqoji fakültəsinin bir qrup tələbəsi, o cümlədən Nəzrin Şirinova, Lalə Mahmudova, Mədinə Nağıyeva, Aytən Hüseynli, Sevinc Allahyarova, Nuranə Zeynalova, Aysu Teymurova və Fidan Hüseynovanın təqdimatında şairin yaradıcılığından lirik nümunələr və sözlərinə bəstələnmiş nəğmələr səsləndirildi.

Xəbərlər

8-noyabr  Zəfər günü münasibətilə ədəbi-bədii gecə keçirilib.

11 Noyabr 2022 Şərh yoxdu

02.11.2022-ci il tarixdə ADPU-nun Ağcabədi filialında 8-noyabr  Zəfər günü münasibətilə ədəbi-bədii gecə keçirilib. Tədbiri giriş sözü ilə “Dillər,ədəbiyyat və onların tədrisi texnologiyası” kafedrasının müdiri dosent Vaqif Allahverdiyev açmışdır.

          30 illik həsrətə son qoyulmasında qələbəmizin qazanılmasında qəhrəmanlıq göstərərək vətən, torpaq və xalq yolunda həlak olmuş şəhidlərimizin əziz xatirəsi  bir dəqiqəlik sükutla yad edilmişdir.

         Tədbirə “ Aran”qəzetinin  və Aran televiziyasının nümayəndələri, Şəhid ailələri, qazilər və müharibə iştirakçıları dəvət olunmuşdur.

        ADPU-Ağcabədi filialının məzun şəhidləri  Abbasov Ağaqardaş İlham oğlunun atası və Məmmədli Namiq Ağamməd oğlunun atası çıxış edərək şəhidlik  zirvəsinə ucalmış məzunlarımızın keçdiyi şərəfli döyüş yolundan danışmış, şəhid məzunlar haqqında hazırlanmış videoçarx nümayiş etdirilmişdir. Sonra söz  Aran televiziyasının rəhbəri, Azərbaycan Yazıçılar Birliyinin üzvü Gündüz  Sevindiyə  verilmişdir.

        Tədbirin gedişində tələbələrimiz  tərəfindən hazırlanmış müharibə səhnələrini əks etdirən və qələbə müjdəli kompozisiyalar nümayiş etdirilmiş, şeirlər söylənilmişdir.

Xəbərlər

Zəfər günü Azərbaycanın şanlı tarixidir

08 Noyabr 2022 Şərh yoxdu

01 noyabr 2022-ci il tarixdə ADPU-nun Ağcabədi filialında Azərbaycan xalqının erməni faşizmi üzərində tarixi qələbəsinin ikinci ildönümünə həsr olunmuş “Zəfər günü Azərbaycanın şanlı tarixidir” adlı elmi-praktik konfrans keçirilib
Konfransdan öncə filialın direktoru, dosent Mobil Məcidov başda olmaqla bir qrup müəllim və tələbələrin iştirakı ilə Şəhidlər Xiyabanı ziyarət edildi. Ziyarət əsnasında şəhid məzarları üzərinə tər çiçəklər düzüldü və müqəddəs ruhları ehtiramla yad edildi.
Sonra filialın “İctimai, təbiət fənləri və onların tədrisi texnologiyası” və “Dillər, ədəbiyyat və onların tədrisi texnologiyası” kafedralarının birgə təşkilatçılığı ilə hazırlanmış elmi-pkaktik konfrans öz işinə başladı.
Konfransı giriş sözü ilə açan filialın direktoru, dosent Mobil Məcidov konfrans iştirakçılarını salamladıqdan sonra xalqımızın Zəfər tarixi ilə əlaqədar fəxarət və qürur hissi ilə danışdı. Qeyd etdi ki, Azərbaycan xalqı düşmən üzərində tarixi qələbəsi ilə əsrin ilk şanlı qələbə tarixini yazdı. 44 gün davam edən Vətən Müharibəsi tarixdə misli-bərabəri görünməyən haqq davası idi. Müharibələr itkisiz olmur. Bizim də itkilərimiz oldu. Lakin bu itkilər bizi ruhdan salmadı və ard-arda əldə edilən qələbələr xalqımızı öz Müzəffər Ali Baş Komandanına və onun yenilməz ordusunun şücaətinə inandırdı. Beləliklə Dövlət, Ordu və Xalqın birliyi sayəsində tarixi qələbəyə nail ola bildik.
Sonra dosent Mobil Məcidov torpaqlarımızın ərazi bütövlüyü uğrunda canından keçmiş şəhidlərimizin müqəddəs ruhlarını anmaq üçün bir dəqiqəlik sükut elan etdi.
Sükutdan sonra Dövlət Himni səsləndirildi.
Söz məruzəçilərə verildi. “Vətən müharibəsindəki zəfərimiz xalqımızın şanlı tarixidir” mövzusunda məruzə edən filialın “İctimai, təbiət fənləri və onların tədrisi texnologiyası” kafedrasının dosenti Məhəmməd Hüseynov Azərbaycan xalqının qəhrəman xalq olaraq tarixi ədaləti bərpa etməsindən, erməni vandallarının təcavüzü nəticəsində itirilən torpaqlarımızın geri qaytarılmasından və bu işdə şərəf və ləyaqətlə döyüşən ordu və onun Ali Baş Komandanı İlham Əliyevin misilsiz xidmətlərindən danışdı. Qeyd etdi ki, Ulu Öndərin siyasi varisi, xalqının ikinci xilaskarı kimi tarixi missiyanı öhdəsinə götürən cənab İlham Əliyevin atdığı strateji əhəmiyyətli addımlar sayəsində müharibənin qələbə ilə başa çatmasına, tapdanmış ləyaqətimizin qisasını almağa müvəffəq olduq. İllər ötəcək, nəsillər dəyişəcək, lakin xalqımızın tarixinə qızıl hərflərlə yazılan Zəfər tarixi heç vaxt unudulmayacaqdır.
Sonra məruzə ətrafında çıxışlar dinlənildi. Filialın ”Pedaqogika, psixologiya və onların tədrisi texnologiyası” kafedrasının müdiri, pedaqogika üzrə fəlsəfə doktoru, baş müəllim Tahir Kərimli, “Dillər, ədəbiyyat və onların tədrisi texnologiyası” kafedrasının baş müəllimi Fəridə Mikayılova, Tədrisin idarə olunması şöbəsinin müdiri Şəbnəm Abbasova, gənc müəllimlərdən Maya Abdullayeva, Pərişan Yolçuzadə, Səbuhi Quliyev və Səbuhi Səfərov çıxış edərək xalqımızın mənfur düşmən üzərindəki tarixi qələbəsindən ürək dolusu danışdılar.
Təxminən 3 saata qədər davam edən elmi-praktik konfrans qələbə coşğusu ilə, həmçinin Zəfər gününün növbəti ildönümlərini işğaldan azad edilmiş torpaqlarda təşkil etmək diləyilə sona çatdı.

Xəbərlər

Gənclər və idman naziri Fərid Qayıbov oktyabrın 21-də Azərbaycan Dövlət Pedaqoji Universiteti Ağcabədi filialının tələbələri ilə görüşüb.

22 Oktyabr 2022 Şərh yoxdu

Görüşdə Gənclər və idman nazirinin müavini Mariana Toteva Vasileva, Nazirliyin Gənclərlə İş Şöbəsinin müdiri Fuad Babayev, Ağcabədi rayon Gənclər və idman idarəsinin rəisi Rüfət Quliyev də iştirak edib.

Filialın direktoru Mobil Məcidov müəllim-tələbə heyəti adından naziri salamlayaraq, təhsil ocağına gəldiyi üçün təşəkkür edib və bu görüşün gənclər üçün faydalı olacağını bildirib.

Görüşdə Fərid Qayıbov gəncləri dinləyib, onların təklif və arzuları ilə maraqlanıb. Tələbələr öz uğurları və fəaliyyətləri barədə danışıb, nazirə müxtəlif mövzularda suallar veriblər. Region gəncləri üçün nazirliyin layihələri haqqında məlumat verilib.

Görüşdə filialın tələbə-gənclər təşkilatı ilə rayon Gənclər və İdman İdarəsi arasında əlaqələrin gücləndirilməsi, müxtəlif təşəbbüslərin birgə həyata keçirilməsi, gənclərin sosial fəaliyyətlərə daha çox cəlb edilməsi və vətənpərvərlik istiqamətlərində fikir mübadiləsi aparılıb.

1 … 4 5 6